الكلام ببلاش

قد مال الكتف اللي ساندها
بعد ما قال عمري ما أميل
قد عاشت في الوحدة بتفاصيل
بأنين
صدى أصوات بتزيد وبتعلى
روحها بتخلى وهتفنى
وهتفضل فى الذكرى تعيد
كان أحن في بعده بدون تجاعيد
صابت القلب بجرح جديد
الروح مشروخة بكسر ملازم للتفاصيل
قفلة نفس وقفلة قلب
حالف ما هيطلع تاني يعيد
نفس المشهد بالتحديد
كل الدنيا في زواية كبيرة
بتسقف على الحزن وبتزيد
في أنين مفتوح..
عارفة إن السم ده هيزيده
في الركن الضيق..
اللي حاويه
بيعيدوا المشهد من تاني
بشماتة وحقد وقلب أناني
كان كل أملها إنه يخف وما يعاني
القلب ضعيف فيها والروح مش قابلة تعيش فيها
بالكسر اللي سكنها وخرّب فيها
فتحت بإيديها للحزن سبيل
في سبيل إن الحزن يكون ليها
سبب التكفير لخطايا.. ما ارتكبتهاش
بغشم القلب اللي سكنها وهدّم فيها.. ما بناش
تتعلم بس إزاي من غلطة.. ماعملتهاش
كان كل الذنب إنها آمنت
لقلوب الغدر.. مايئمنهاش
قد عاش..
قد عاش على القلب المكسور
بعد ما قدم كل أذاه وباع ببلاش!
كان قالها ناوي ما يجرحهاش
والنية في قلبه ماشافتهاش
فلمحت في عينيه الصدق بسذاجتها
وخانها شعورها فنسيت إن
الكلام ببلاش.
*****
رانيا إبراهيم خليفة