[ad id=”66258″]
متابعة سالم هاشم
هنتكلم عن ..مشكلة_جرثومة_المعدة بالتفصيل
# س – إيه هى جرثومة المعدة ؟
– ج – دى عبارة عن بكتريا تدخل الجسم عن طريق الاكل والشرب وتفضل عايشة جوه القناة الهضمية بتاعتك . بيسموها الميكروب الحلزونى او جرثومة المعدة ( H.pylori ) …
# س – هل منتشرة بين الناس ولا محدودة فى ناس معينة ؟
– ج – منتشرة جدا بينا كلنا .. تخيل مثلا لو عددنا ٩٠ مليون فى ٦٠ مليون معرضين للإصابة بيها ( حوالين تلتين السكان ) ..
# س – طيب هل تعمل قرحة مع كل الناس ؟
– ج – لا غالبا مش بتعمل مشاكل مع كل الناس لكن الناس اللى عندهم مشكلة فى المعدة زى التهاب هتعملهم قرحة …
# س – طيب بتدخل الجسم ازاى ؟
– ج – بتدخل مع الأكل والشرب ..
– الأكل اللى مش نضيف او اللى مش مطبوخ كويس يعنى ني شوية ولذلك بتجي لمعظم الناس اللى بياكلوا من المطاعم خصوصا لو مطعم مش نضيف او الأكل مش مطبوخ كويس …
– الشرب طبعا اللى مش نضيف وطبعا مصر المية بتاعتها غالبا فيها بكتريا عشان نظام الصرف عندنا داخل مع الرى ومع الشرب …
# س – طيب دخلت خلاص ها وبعدين بتعمل ايه فى المعدة ؟
– ج – ممكن تفضل سنين فى جسمك بدون مشاكل وطول الفترة دى واحدة واحدة تبدأ تهاجم بطانة المعدة والأمعاء وتعمل تآكل فيها زى جرح كده فلما المعدة بتاعتك تفرز حمض ال HCL اللى بيهضم الأكل يقوم يروح على المناطق المجروحة دى ويعمل قرحة معدة …
[ad id=”87287″]
# س – طيب لو انا عندى قرحة نتيجة جرثومة معدة هحس بإيه ؟
– ج – هتلاقى عندك ألم فى بطنك ومعدتك فاضية وانت جعانة ولما تاكلى الألم يخف شوية ويرجع يجى تانى بين الوجبات ..
– دايما عندك انتفاخات وغازات ..
– دايما عندك تكريع …
– هتحسى بغثيان وممكن ارتجاع ..
– وزنك هيقل فجأة بدون سبب …
# س – ايه العلامات اللى اخاف منها الخطيرة ؟
– ج – لو فى دم فى الموضوع ..
– سواء دم فى البراز احمر او البراز لونه اسود ..
– او لو رجعتى دم ..
– او لو الالم على طول مش بيروح او حاسة بتعب شديد وتوهان ..
# س – طيب إزاى اتأكد ان عندى جرثومة المعدة ؟
– ج – باالتحاليل اعملى تحليل H.pylori سواء فى الدم او البراز ..
او الطريقة التانية بالمنظار ..
# س – طلعت موجوده عندى ايه العلاج ؟
– س – غالبا العلاج بيكون ١٤ يوم
– بتبدأى .. بالعلاج الثلاثى ..
اوميبرازول ٤٠ مجم حبة قبل الفطار وقبل العشاء
مترونيدازول ٥٠٠ مجم صباحا ومساءا بعد الاكل
كلارثرومايسين ٥٠٠ مجم صباحا ومساءا بعد الأكل
كملى ١٤ يوم بنفس الجرعات
بعد ١٤ يوم كملى على الاوميبرازول بس ..
# س – امتى اعمل تحليل اتأكد راحت ولا لأ ؟
– ج – بعد شهر من العلاج ..
# س – طيب هل فى ادوية بتأثر على نتيجة التحليل ؟
– ج – ايوه المضاد الحيوى لو بتاخديه وروحتى عملتى تحليل هيطلع سالب عشان كده قبل ماتروحى لازم توقفى المضاد الحيوى اسبوعين على الاقل قبل ماروح …
# س – إزاى احمى نفسى وولادى من جرثومة المعدة ؟
– ج – النظافة ثم النظافة ثم النظافة …
– لما تدخلى الحمام اغسلى ايدك كويس وانت خارجة ..
– قبل ماتاكلى اغسلى ايدك كويس …
– الاكل يستوى كويس بلاش أكل نى وبلاش اكل مطاعم ..
– بلاش تشربوا من مية الحنفية او اشترى فلتر فى بيتك ينقى الميه ..
– بلاش عصبية او ضغط عصبى او تدخين او خمرة …
# س – طب ايه الاكل اللى ياكله مريض جرثومة المعدة ؟
– ج – الصبح حليب بالعسل او ميه بالعسل على الريق ..
– وجبتك يكون فيها خضروات وفواكة وحبوب كاملة …
– بالليل عشاء خفيف فيه علبة زبادى …
– بلاش تاكلى كتير مرة واخدة وكلى وجبات صغيرة اكتر من مرة ..
– بلاش فواكة حمضية زى الليمون واليوسفى والبرتقال ..
– بلاش مقليات بزيادة او اكل مسبك بزيادة وملان دهون …
– بلاش بهارات او حراق زيادة …
– بلاش شاى او قهوة خصوصا علر معدة فاضية …
– بلاش خمرة …
# اتمنى اكون جاوبت على كل التساؤلات اللى بتدور فى ذهنكم
