دمياط: محمد جمعه الموافي
نشر منذ قليل علي صفحته الرسميه المبدع الدكتور محمد أحمد العدل قصيدته الجديده ينعي بها شهداء الكاتدرائيه عقب التفجير الذي وقع بها صباح الأحد وراح ضحيتها العشرات من الأبرياء
_( سُميَّة ) و ( مارِى )
و خالتى (صفيَّة ) و طنط( تريزا )
و عَم ( مكَارِى )..
_ و ( مُرقُص ) افندِى
و عمِّى الشيخ ف المسجد جَارِى..
_و (كريم),,(عطوه )
و (حنَّا ) و (بُطرُس )
أحسن صُحبة تروَّق بالِى..
_(حمُّوو ) بتَاع القهوه دا صاحبى
و عمِّى ( شنوده ) ,,
دا جارِى الغالِى..
_و كمَان ( ينِّى ) الواد العِترَه
هنَاك ع الناصيَه ,,
يَامَا ضحَّكنَا سنين و ليَالِى..
_الكُل اصحَاب..الكُل حبايب
مُسلِم كان أو هُوَّا مسيحِى
أولاد بلدِى ..أهلِى و ناسِى..
_صُورة جميلَة تعبَّر فِعلاً
عن إحسَاسِى..
…
_راح أحكيلكُم
كيف كان حالنَا
زمااااااااااااااان من بدرِى..
…
_ف العصريَّة
تحت التُوتَه
و الجمِّيزَه ف أرض العُمدَة..
_( طَه ) و ( مُرقُص )
يلعبُوا طَاولَه مع بعضيهُم
_و ( فاطمَة ) و ( مارِى )
يلعبُوا أُولَه و النُطّيطَه..
_و ضحكة عَم ( شنودَه ) و ( أحمد )
ترسِم أجمل ورد جنينَه..
_قعدَه جميلَه بتجمَع بينَّا
و عُمر ما حد ف يُوم اتزمزَق
و لا حد غريب
راح وقَّع فينَا..
_
_ كُنَّا زمان :
كُلِّنا إيد واحدَه..
_عَم ( شنُوده )
يبَارِك صُومنَا..
_ و يصحّينا
لَجل سحُورنَا..
_و يُوم الوقفَة بتَاعة العيد :
خالتِى ( تريزا ) بإيدهَا تجهِّز
كحك العيد ,,
و يباركُولنَا بعد فطُورنَا..
…
_طُول العُمر :
و احنا جيران,, و احنَا زمايل
و احنَا صُحَاب
_ناكُل..نلعب حتَّى نذاكِر
معَ بعضينا..
_( جورج ) ف ديرُه راح يتعبِّد
و ساعة الجُمعَة أروح المسجد
كُلُّه ف حالُه..كُلُّه ف دِينُه..
_ و لو عيَّان :
فرض عليَّا أروح أداويه..
_و هوَّا كمَان :
ساعِة فرحِى يفرَح لِيَّا
و ساعِة هَمِّى ألاقيه جنبى
و كمَان غمِّى راح يبكيه..
…
_كنَّا زمَاااااااااااااااااااااان :
كُلنَّا مصرى ,,
وطنَّا الغالى راح نبنِيه..
_هلال و صليب
إيد مع إيد دايماً نحميه..
_مُسلم كان أو هُوَّا مسيحى
كُلِّنا واحد عايشين فيه..
(كُلِّنا مصرى..)
