كتبت كتير عن الماضى وبكتب لسه عا الحاضر
وعا الغايب وعا الشهداء وعا الثــوار
وعالظالم مع المظلوم وعا المحتار
وعالى عشرته بتهون وعاالخاين وعا الغدار
وعالى إدا لأخوه بالنار وفاكر إنه أخد التار
وعالى ف وطنه بيخرب ومش دارى إنه وصمة عار
كتبت كتير ومتأثر بكلمة حق مش أكثر
وفى الأخر لقيت كل الكلام إنهار
وقع من طوله وسط الدار
وراح منى ف غيبوبه بيتوتر
وشيلنى الهموم أكتر
وحطيت إيدى على حرفه
لقيت خطه مولع نـار
صرخت وقلت ياستار
من الحاصل وم الأسرار
جريت جبت الحكيم يكشف عليه ف الدار
سألنى سوأل عن الكلمه وعا المشوار
وقالى الكلمه حلها دمار
ياريت تتمشى وياها توصلها
تاخد إيدها تسندها للأقرب ندوه أو دوار
ودور بيها وفصحها على الأوتار
ولحنها وغنيها وخليها بمعانيها تشق النار
……………………………………..
بقلم عادل دبـل
