الجمهورية اليوم دوت كوم
موقع اخباري شامل اخبار عربية وعالمية وظائف اهرام الجمعة خدمة الاسعار

المناعة النفسية (Resilience)

- Advertisement -

بقلم دكتور / خالد الجندي..

 الجسم له جهاز مناعة النفس الإنسانية كمان ليها جهاز مناعة، أحيانا بنسأل ليه واحد اتعرض لموقف بسيط و تافه في وجهة نظر بعض الناس، لكنه دخل في دور اكتئاب أو إدمان أو حتى فقد قواه العقلية، في حين واحد تاني ممكن يكون اتولد في الشارع واتعرض لكل أنواع الضغوط في الدنيا لكنه طلع قوي وانتصر على الظروف اللي ضده، والمثل بيقول الضربة اللي ماتموتكش تقويك، لكن ليه الضربة تموت واحد ونفس الضربة أو أشد منها مع واحد تاني تقويه؟!
هنا بنعرف حاجة اسمها المرونة النفسية قدام الضغوط والصلابة في مواجهة الصعوبات يعني المناعة النفسية(Resilience)، عشان نفهم الصورة أوضح هات كورة بينج بونج و هات كورة تنس، اضغط على الاتنين بصوابعك واحدة هاتتفعص والتانية لأ لكن هاتنضغط وترجع لوضعها الأصلي، اخبط الاتنين بعزم ما عندك في أنشف حيطة، واحدة هاتتكسر وتقع والتانية هاترد بقوة في وشك وممكن تطير عينك!
عشان كده في واحد الضغوط بتقويه وواحد تاني بيتكسر، واحد يتعلم النجاح من صموده قدام 1000 محاولة فشل، وواحد تاني قدام أول تهديد بإنه احتمال يفشل بيقرر ينسحب و يرفع الراية البيضا مستسلم قدام الفشل!
فين الفرق وليه ده بيحصل؟
في اختلافات جينية ووراثية بين البشر بتحدد درجة حساسيتهم وشعورهم بالألم، قدرتهم على البكاء ودرجة احتمالهم للإحباط، لكن في الحقيقة مش دي كل الحدوتة لكن في عوامل كتير من البيئة والتربية بنمر بيها بتوصلنا للحالة بتاعت دلوقتي سواء كورة بينج بونج هشة أو كورة تنس قوية.
طب اكتشفت إني كورة بينج بونج بانكسر بسهولة، هل في أمل إني اتغير و ابقى كورة تنس متينة؟
طبعا، وهو ده محور زيادة المتانة النفسية للشخص اللي مر بضغوط أو أصبح مريض نفسي، مش كفاية إننا نعالجه من الاكتئاب أو الإدمان أو الوسواس أو الفصام لكن المهم إننا نقوي المناعة النفسية عشان ماتحصلش انتكاسة قدام أي تهديد أو خطورة محتملة في المستقبل، فركز معايا كده يا سيدي عشان نفهم سوا إيه اللي تقدر تعمله و تشتغل بيه على نفسك.
1.العلاقات الإنسانية:
العلاقات اللي فيها حب وقبول وتشجيع ومساندة دي من أهم عوامل المناعة النفسية، إحنا كائنات اجتماعية ماتخلقناش عشان نعيش في فقاعة لوحدنا لكن جوا مجموعة، محدش فينا يقدر يكون منعزل وفي نفس الوقت قوي، طب لو مفيش علاقات مشجعة زي كده في حياتي أعمل إيه؟ يبقى تعمل علاقات جديدة وصداقات تسندك، وقبل ماتسأل السؤال اللي وراه هاجاوبك و أقولك اعمل علاقات جديدة حتى لو كان عمرك دلوقتي 80 سنة وعمرك ماكان ليك أصحاب.
2.خليك مرن:
تعريف تانية للمناعة النفسية هي قدرتك على المرونة، إنك مش بتقفش لو الدنيا مش ماشية بطريقتك، اكسر المألوف واختار اختيارات مختلفة، يمكن تنفع المرادي! جدد واعمل حاجات بتجربها لأول مرة، هاتخسر إيه؟!
3.حدد خطط واقعية وخد خطوات واضحة لتحقيقها:
جزء مهم في مهارات الصلابة النفسية إنك تقدر تأكد حقوقك من غير ماتبقى عنيف أو سلبي وخانع، حدد انت عاوز إيه و إيه الإمكانية المتاحة في الواقع وخد خطوة، ماتقولش نفسي أعمل ونفسي اكون وماتضحكش على نفسك بأحلام اليقظة، لكن خد تحدي واضح و ابدأ في الكورس أو الرياضة أو المهمة اللي انت عمال تأجلها بقالك سبع سنين.
4.اتواصل بفاعلية مع الناس، واتعلم تحل المشكلات لوحدك ووسط فريق:
مهارة مهمة جدا جدا جدا، اننا نتواصل.. نسمع بعض.. نتبادل الاراء ونشوف المشكلة ونحاول نحلها سوا، انضم لفريق، العمل جوا فريق حتى لو مش أصدقاء بمعنى الكلمة لكنه بيساعدني جدا إني أفهم واتفهم و احل مشاكلي ومشاكل الفريق واحنا مع بعض.
5.اتعلم تدير مشاعرك:
اعرف انت حاسس بإيه دلوقتي عشان تعرف تحترم مشاعرك كويس وتقدر تركنها على جنب لحد ماتفكر، جزء مهم في المناعة النفسية هي مهارة إدارة المشاعر والتحكم في النزعة المندفعة و الانفعال والغضب، يعني لما تبقى شايط وغضبان أو موجوع جدا احترم مشاعرك واركنها على جنب قبل ماتاخد أي قرار ممكن يخليك تخبط في الحلل في لحظة غضب.
6.خليك واثق في نفسك:
عارف انه مش بالساهل، لكن لما تعرف تشوف نفسك بشكل إيجابي هاتقدر تعافر وتواجه قلقك و تعبك، لما تخرج وتساعد حد محتاجلك وتكتب جوانب قوتك لما تفكر نفسك بخبرات نجاحك في الماضي هاتعرف تواجه وتصمد وتكمل حتى لو النجاح لسه مش واضح.
7.ابحث عن هدف ومعنى:
جزء مهم في المناعة إنك تطلع برة دايرة الأحداث الصادمة وتنظر للهدف الروحي والمعنى الديني وسط الألم، إنك تبقى عندك مبادئ مؤمن بيها وعايش بيها حتى وسط المحن وحتى لو محدش شايفك.
8.بص على الصورة الكبيرة:
النقطة دي مرتبطة بالكلام اللي في النقطة 5 و7 ، كادر الحياة عامل زي صورة مصنوعة من الفسيفساء، مليانة تفاصيل وفيها الأبيض والأسود والألوان، ماتتزنقش في تفصيلة صغيرة وتقفش على نفسك أو على الناس لأن الصورة الكبيرة هي اللي فيها المعنى الكامل، أوعى تدبس في لعبة اللوم ومين الغلطان لأن محدش بيطلع منها كسبان، لا تبص لغيرك كمتهم إنه دمر حياتك خلاص بسبب موقف عمله معاك، ولا تلوم نفسك إنك عملت غلطة بالفورة كلها وإنك مسئول عن كل كوارث كوكب الأرض، الصورة الكبيرة بتبلع كل التفاصيل بحلوها ومرها، المهم نتعلم.
9.اتعلم تستخدم المرح وتقدره:
أحيانا بيسموها الكوميديا السوداء، لكن حتى وسط الوجع تقدر تقف على أطلال بيتك المهدوم بعد ما اتحرق وتعرف تقول نكتة وانت موجوع، الضحكة في الأوقات دي ممكن يبقالها مفعول السحر وساعتها تقدر تبني بيت أجمل و أصلب بكتير من العشة اللي اتهدمت، بس عشان سمحت لنفسك تضحك على الوجع.
10.خد بالك من نفسك:
ممكن نضحك على النقطة دي، آخد بالي من نفسي ازاي؟
راعيها واهتم بيها سواء برياضة أو دايت أو هواية ممتعة، خصوصا الناس اللي مشغولين يساعدوا غيرهم وبينسوا انهم زي باقي البشر بيتعبوا و بيمرضوا وبيكتئبوا وبيحسوا بالملل، خد بالك من نفسك لأنك مش هاتكسب حاجة لو أحييت العالم كله وقتلت نفسك!
11.قدم الرعاية للغير:
عشان احنا مش مخلوقين لذواتنا، فعمرنا ماهنكون أقويا غير لما نقدم الرعاية والسند جسديا ووجدانيا، إني أطلع برة دايرة نفسي وأنانيتي وأقدم رعاية لحد محتاج بدون مقابل، ممكن يكون عمل تطوعي أو خيري أو عمل باساعد فيه إنسان تاني و اشعر فيه بمعاناته، عمل مش مستني فيه مكافأة من بشر ولا حتى طمعان في الثواب من ربنا، القصة مش مقايضة لكن عمل مدفوع بالحب.
شوفتوا بقى المناعة النفسية مش مجرد جينات ولا تربية ولا ظروف حوالينا، المناعة النفسية هي اختيار كل يوم أنا اللي باقرر أعيشه ازاي، زي كورة البينج بونج ولا زي كورة التنس!!

- Advertisement -

قد يعجبك ايضا
اترك تعليق

يرجي التسجيل لترك تعليقك

شكرا للتعليق