مشنة سعيدة
الحلقة10
ورود واشواك
بقلم الكاتب:عاطف محمد
_ فى الصباح الباكر سمعت رضا طرقا على الباب ولكنه كان طرقا خفيفا، فاسرعت وفتحت الباب فوجدت أمامها شيخا كبير السن له لحية شديدة البياض يملأ وجهه نور الإيمان(ما هذا هل أصبح الحلم حقيقة لم يتوقف تفكير رضا كثيرا )
السلام عليكم يا بنتى(قالها بصوت محبب إلى الأذن)
وعليكم السلام ياجدى عبد الرحمن(قالتها مبتسمة ومرحبة)
عامل أيه فينك من زمان
كنت مسافر عند بنتى اسماء فى اسكندرية، يعنى تغيير جو
طب اتفضل ادخل( ولما دخل واستراح) تشرب أيه؟؟؟
ولا اقولك تفطر معانا
انا جبت فطار معايا (ناولها كيسا كبيرا ) يلا طلعى الفطار وصحى اخواتك عشان نفطر سوا وحشتنا أيام زمان.
يادى العيبه ياجدى يعنى مش هانقدر نفطرك جايب فطارك معاك
يا بت ياخايبه أنا جاى أفطر معاكم اتونس بيكم انتم ريحة الغاليين،
وانت غالى علينا ياجدى عبد الرحمن
ده جدى عبد الله التهامى كان بيحبك قوى ده كفاية ضحكتك إللى بلون السما الصافية
عارفة السما صافية ليه يارضا؟
ليه ياجدى؟
علشان البشر مش عايشين فيها (ضحكت هى والجد عبد الرحمن)
وهنا استيقظ الجميع وسلموا على الجد عبد الرحمن وتم إعداد الطبلية
وجلس الجميع
عامل ايه ياجدى والله زمان
فاكر يا عرفه لما كنت انت واخواتك رضا و صابرين وفرج ، ربنا يرد غيبته
انت عرفت ياجدى
عرفت كل حاجه، وجيت أقف معاكم ،
احفاد عبد الله التهامى احفادى ده صاحب عمرى ولازم أرد جمايله عليا
تسلم ياجدى
بالنسبة لمصاريف الكلية بتاعة رضا و عرفة والولاد كلهم أنا متكفل بالباقى منها
تسلم ياجدى شايلينك لعوزه
مش عايز كلام مالوش لازمه، انتم من هنا ورايح مسئوليتى لغاية ما ربنا يفك سجن أمكم بنت الأصول ويرجع ابوكم لكن قبل كده أنا مسئول عنكم ولا كلامى مالوش لازمه.
لاء ياجدى أنت على الرأس وكلام أوامر
كفايه مصاريف الكلية إللى دفعتوها
كليه… دفعناها احنا مادفعناش حاجة لحد دلوقتي
ازاى بقى أنا رحت ادفع المصاريف ليكم كلكم لقيت كل حاجة مدفوعة
بس احنا مادفعناش
مش عارف، بس ولاد الحلال كتير، اكيد دفعوا الفلوس
ماهو جدكم وابوكم وامكم ليهم جمايل كتير فى رقبة أهل كفر العنب
سمع الجميع صوت نفير سيارة أمام الدار فخرج عرفة ليعرف الأمر
ازيك يا استاذ عرفه
اهلا يااسطى كريم خير فيه حاجه
أبدا جيت اعرف مواعيدكم انت والانسة رضا علشان اوصلكم واجيبكم من كلياتكم
ربنا يخليك أحنا متشكرين تسلم على كرمك وذوقك ووقفتك جنبنا
بص ده واجب علينا كلنا بس انا خدت أجر على ده ولازم احلل الفلوس واعمل بيها
فلوس ايه ومين إللى ادهالك؟
لاء مااقدرش أرد على الأسئلة دى أنا عبد المأمور اوصلكم واجيبكم وبس إنما مين وليه مش بتاعتي .
لم يستطع عرفة معرفة اى شئ سوى ان الأسطى كريم سوف يوصله ورضا للكلية رايح جاى .
خلاص بعد يومين الصبح الساعة سبعة
تمام هتلاقونى الساعة سبعة جاهز السلام عليكم
واستدار بالسيارة وانطلق سريعا
دخل عرفة متعجبا وقص ما حدث على الجميع ولكن لم يعرف أحدهم من وراء هذا
_ انت تنضف هنا قدام الوكالة اعمل بلقمتك وانت مالكش لازمه فى الحياة كده، أنا عارف البلاوي دى بتترمى علينا منين
(ولكزه فسقط على الأرض )
قوم يا عم ااااا.. بالراحة على الراجل يافارس.(لم تكن هناء تعرف اسمه ) ولا يهمك بكره تتعدل ماتزعلش
(لم يرد، فقط انهارت الدموع من عين قاسم )
أوعى يخيل عليكى شوية الدموع يا دكتوره هناء دى دموع التماسيح
ده احنا لغاية دلوقتي مانعرفش اسمه أيه
وفيها أيه، انت شوفت منه حاجه وحشه؟
لا حلو لا وحش ، بس شمام والكيف ذله
نقوم احنا نذله أكتر
يحمد ربنا أنه لاقى شغل
باين عليه غلبان
انت إللى غلبانه ، هاه عايزه فلوس تانى
لاء متشكره يا فارس يااخويا، وبعدين انا اتعلمت ان شوية ميه قليلين ينفعوك وحبة ميه كتار يغرقوك وانا اتعلمت احمد ربنا و اكتفى باللى أملكه وماابصش للزيادة …
ماشى يا ست الدكتوره ربنا يكملك بعقلك
لسه بدرى على دكتوره دى أنا لسه بااقول ياهادى
تمام مع السلامة يا ست الدكتوره
برضه…. تبتسم وتربت على كتف الرجل وتسير لتركب مع أحد رجالة فارس لتوصيلها
خلى بالك منها يافهيم
عينى يا فارس باشا تنطلق السيارة بعيدا ….
عارف لو أنت مش متنيل مدمن كنت شكيت فيك انك حكومة، وبعدين انت جاى من طرف الحاج
لم يرد الرجل
يحضر أحد الرجال يهمس فى إذن فارس
كده تمام اعملوا حسابكم بضاعة الحاج فريد واصل تجهز لحد مااقولكم معاد ومكان التسليم
خلصانه بشياكة
المعلم بشندى اتبسط من البضاعة
احنا بضعاتنا اصلى والنوع الجديد ده اكسترا والطلب عليه صاروخ
هى المزمازيل هناء راحت كليتها
اه ليه ياجعفرى فيه حاجه
لاء ياريس بس كنت عايز اوصلها دى اخت الباشا الكبير
الواد فهيم راح يوصلها وهو اللى هايرجعها
انا قولت ….
ايه ياجعفرى هو فيه قول بعد قولى
لاء يا باشا احنا كلنا محاسيب جنابك
طيب فيه أيه؟!
هو أنا ممكن افاتحك فى موضوع كده
اخلص عايز ايه
انا رجلك ودراعك اليمين
وبعدين
باقول يعنى لو…..
لو أيه…
انا بصراحة كونت نفسى وخيرك مغرقنى، واقدر افتح بيت
طب ما تفتح حد حايشك
كنت عايز بنت الحلال
شاور على اى واحدة وانا اخطبهالك
ماهى بنت الحلال مش بعيده وانت عارفها
مين دى يا ترى
الدكتورة هناء
الدكتوره هناء مين
اخت معاليك ياباشا
أختى أنا
ويبقى لى الشرف يا باشا
طب انا باشا وهى دكتوره ازاى بقى تتجوز جعر ذيك أنا نسيت نفسك ياجعفرى(بعنجهية شديدة)
كنت فاكر انى ليا عندك خاطر(مصدوما)
مش لدرجة انى اجوزك اختى فوق ياجعفرى وأحلم على قدك
(ينظر له بعتاب )
هافوق واوعدك حلمى هايبقى على قدى (قال مخاطبا نفسه)متزعلش ياجعفرى أيه ياعنى لو الناس نسيت فضلك أنوار الشوارع بتتنسى لما يطلع نور النهار، والحاجات إللى احنا عايزينها بتيجى على قد سعيك ليها مش على قد رغبتك فيها، مسيرتها تتعدل،
تمام يا فارس باشا ايه خدمة كلنا خدامين جنابك.
لاء انجر اعمل إللى قولتلك عليه
(ينظر له نظرة ذات معنى)
_عاملين أيه يارضا؟
الحمد لله ياامه خليك انت فى نفسك الدكتور قال عندك ايه
مش عارفه يارضا لما يجى نسأله اهو حاجزنى فى المستوصف بقاله مدة
مش عارفه ياامه مين دفع مصاريف الكلية وكمان بعت عربية تواصلنا وتجيبنا أنا وعرفه ،وكمان دفع مصاريف مدارس اخواتى
لازم تعرفوا مين و تردو كل مليم احنا مانقبلش صدقة من حد فاهمة يارضا
ان شاء الله ربنا يفك ضيقتنا
مش عارفة ياامه سبب الضيقة إللى احنا فيها
كل ده خير والحمد لله الضيقة إللى ماتعرفيش ليها سبب دى، ممكن تكون ذنوب بتطلب مننا أننا نستغفر والحمد ربنا أدانا فرصة نستغفر
(وهنا دخلت صابرين فى لهفة وكادت أن تتكلم لولا ان أمها ليست فى حالة مناسبة )
فيه ايه يا صابرين ؟
مافيش ياامه قلبى كلنى عليكى قولت اجى اطمن
والبيت واخواتك
كله ماشى تمام ياامه ماتقلقيش
بس حاسه ان فيه حاجة وانت مش عايزه تقوليها
ماتشغليش بالك
فهمت رضا ان صابرين تريدها على انفراد
عن اذنك ياامه هااقول لصابرين على حاجات تعملها وهانخرج بره علشان مانصدعش دماغك وتخرجان ولكن قبل الحديث أقبل الدكتور
كويس انى لقيتكم لوحدكم ااااا
فيه ايه يادكتور؟
الست سعيدة لازم نعملها عملية صغيره
عمليه عملية ايه ؟
فى الحلقة الحادية عشر موعدنا للإجابة على
مانوعية العملية التى ستجريها سعيدة ولماذا؟
وماذا أرادت صابرين ان تخبر رضا؟
وما أحوال قاسم وفرج
كل هذا وأكثر انتظرونى فى الحلقة القادمة ……
تعليقاتكم تثرينى وتحفزنى للمزيد من الابداع القصصى، كل الشكر على تعليقاتكم وملاحظاتكم وثناءكم الكبير .
