كنتى قولي
الشاعر :عاطف محمد
كنتى قولى أنك هاتمشى
أو حتى سيبى ف يوم خبر
صحصحينا عرفينا
قولى خلاص وقتى انتهى
وصلت حياتى المنتهى
عارف بإن ده مش بإيدك
ولا ليكى فيه حتى خيار
وان رب العزة يقدر
إن كان ف ليل أو ف النهار
أكيد لا يمكن نعترض
بس الفراق طعمه مرار
وأحنا مالحقناش شبع
ولا قلوبنا ترتوى
من فاكهة مليانة البدع
اعذرينا طماعين
طب هو حد يشوف حنين
ولا يرتويش
أو قمره ساكنه بيته
ينام ف يوم ويغطى شيش
ده يبقى حتى حرام عليه
لو غمضت ثانية عنيه
فيه ناس كده
لو جيت تبص ف وشهم
تلقاك شبعت من الرضا
وملاك أمان
وتعيش حياتك ولا 100 أمير
فرح كتير
وضحكة
من أول غيطان المبسوطين
لحد سكة حلمنا
وانتى كنتى الأولى
ضمن المختارين
للفوز بملكة قلبنا
تلاتين سنة نفس اللقب
نفس المكانة والأمانة والحنان
حتى الجنان لما بتجرى وتلعبى
وتبوسى جبهة خدنا
يادى الهنا لما ايديكى
تلعب ف خصلة شعرنا
وتدلعينا ف اسمنا
وتنادى مع فجر السنا
قوموا خلاص
وجبت صلاة
يالا ياعاطف إمنا
عايزين نصلى لربنا
ونحمده ونشكره
على كل نعمه عندنا
قد أيه كان فيكى تقوى
وصوت خشوع
وطيبة
مافهاش يوم رجوع
علشان كده بعدك ألمنا
وحز فينا بالقوى
بس اللى خلا قلوبنا
تطمن قوى
انى باحس انك معانا
روحك هوانا
جوه النفس
ضمن ذرات الهوى
ف البسملة
جوه الازايز والكوبايات
حتى السكات
ليكى فيه حيز كبير
متشكرين
على كل لحظة ف عمرنا
سمحتى نقضيها معاكى
متشكرين
يانن عين قلبى أنا
يااحلى جنه للهنا
ياسميه
يا نور عمرنا
