وجعلني الشعر أسكن بيوته
فتحلي أحضانه فضميته
وركنت يومها على الجراح
نسيت نفسي وأنا بحكي اللي راح
فتحت طاقة وجع
بسرد سكاكين قلبي اللي اتوجع
من كل طعنة صابتني فيه
فازت
والخسارة كانت ليه
قلبي اللي صابه العجز والتجاعيد
صارت علامة بتقتله وتزيد
وجعه اللي اتفتح
وبكونه يومها ادبح
صعب الحياة هتعود
لروح فاضت
كل السكات اتبخر
كل الكلام قد جف
كل اللي فكر يومها
إن قلبي خف
دا لأنه بس مشافش
مشهد جنازته ودفنته وقت الحصار
لما يومها خد قرار
بالانتحار
وأما قرر يبني غار
يئوي ضعفه ويئوي جرحه
يركن بعيد
عن كل ضيق وكل إيد
عايزة تطوله وتقتله
عن كل شخص بيخذله
عن كل جرح اتصابه وعلم
جوه منه
بهدوء إتألم وفي سكات
وقتي اللي فات
عشان بحاول أثبت براءتي من الجراح
كل اللي راح
مبقاش خلاص من تاني يرجع
قلبي بقا رافض يسمع
والشعر قاله أنت هنا متصان
ننسى اللي راح ننسى اللي خان
ننسى اللي أذانا وصابنا بالكتمان
فتح له شبابيكه والبيبان
قاله اسكن في القصور
وانسى كل المر قبلي
افرد جناحك طير ورفرف
كل اللي جاي هيمحي لك كل اللي قبلي
فضفض بحرية وانسى الأذية
واكتب هنا في بيوتي
كل اللي روحك حابة تحكيه
جوايا الدوا والله هتلاقيه
بحلفلك بكوني الشعر
كل اللي زارني
كرم الضيافة غواه
واستوطنني لأجل إنه لقاني
برضي هواه.
ــــــــــــــــــــــــــــ
2-رباعيات..
كل اللي رحلوا عن حياتنا
ما بيشبهوش العالم القاسي
كل اللي سابوا ذكرياتهم علمت
والقلب مش ناسي
كل اللي خلوا حياتنا وردي
سابوا قلوبنا بفراقهم تآسي
كل اللي راحوا في صغرهم
بكوا قلوبنا وصوت الصراخ آذي.
كلمات ..رانيا ابراهيم
