بقلم.أحمد صبري
كلامك يا بحر سطور
اْمواجك سلاسل نور
لونك جميل وازرق
دواماتك فيها ندور
نسيمك فجر بيشقشق
على قلب بات مكسور
يصبر ويحن يعشق
يرمي الهموم بالدور
–
بحب يا بحر مواويلك
على لحن هواك اْغنيلك
دفايا شمسك ونهارك
هوايا قمرك و ليلك
من سحرك واْسرارك
ملاين الناس بتجيلك
وف بردك واْمطارك
بتعلى وتشد حيلك
–
ويخلص الخريف تنسى
وترجع بالربيع همسه
اْسمع ضحكتك جواك
يقربني إشتياق لمسه
وليا م الذكريات وياك
تكفي م القصص خمسه
وعيني تتسعد بلؤاك
لكني مالتقيت مرسى
–
بحبك يا بحر بوجداني
وليه على شطك التاني
ناس عايشة حياه اْجمل
وعندنا الناس بتعاني
تتمنى تموت او توصل
اْحزانهم تشبه اْحزاني
يروح العمر وبيفضل
سر المجني والجاني
