الرئيسية / عاجل / الشاعر محمد يوسف… يكتب …” زفة شهيد “

الشاعر محمد يوسف… يكتب …” زفة شهيد “

زفة شهيد

بقلم/ محمد يوسف

مات كام شهيد!!؟
إيه الجديد؟
لو مات شهيد. فيه ألف غيره بيتولد
دا شئ اكيد
نام يا شهيد
افرح وعيش في جنتك
اليوم دا عيد
نبكي ونصرخ من الفراق
وبإيه بفيد
هتقولوا عشنا بحسرته. واهو راح بلاش
لا دة احنا متنا من الأسى. وهو اللي عاش
ياما ناس كتير ماتوا في حياتنا. ومهمناش
بس النهاردة عريسنا طالع للسما بدر التمام
زفة ملايكة مزهزهة لأجمل غلام
علي إيه بقى حسرة وآلام
يمكن زعلنا كان قلق
على حلم عمره اللي اتسرق
على قلب أمه اللي اتحرق
لكن دموعنا بس حبر علي ورق
ولا تسوى نقطة من دمه وحبة عرق
ازاي دموعنا تساوي اطهر ما خلق
وعلى ايه دموع بزيادة هم كفاية
مبقاش رجوع ولا دي هتبقي نهاية
قيدو الشموع واقرو عليه كام آية
وادعوا بخشوع تعلى لمصر الراية
ولسة المدنة مرفوعة بآدان منصور
ولساه الصليب واقف و مش مكسور
و لسة فيه أمل طالل في قلب النور
وراح نزرع بيوتنا خضار وارضكوا بور
ومهما تحاولوا يا أندال هتفضل مصر
وحتى لو هدمتوا السور هيبقى القصر
ونحلف مهما كان منكم هييجي النصر
وهنصلي في كنايسنا صلاة العصر

Facebook Comments

شاهد أيضاً

التعليم الفنى ودورة فى التنمية الأقتصادية

كتبت لولو موسى حاضر بها د/ أشرف يوسف محمد – أستاذ مساعد ملابس ونسيج المحاضر …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *