الرئيسية / المزيد / الصحة / موضوع “عايز اخس ومش عارف؟”

موضوع “عايز اخس ومش عارف؟”

بقلم : ماركو عادل نصحي
بناء علي طلب السادة المشاهدين ? الناس اللي طلبت منى انزلكو موضوع الدايت مكتوب
فالبداية اعرفكم بنفسي انا اسمى ماركو عادل نصحي في خامسة طب الزقازيق
هكلمكو عن مشكلة الشعب المصري كلو انا تخين ومحتاج اعمل دايت ومش عارف??
الاول الدايت دة ارادة الارادة دي حاجة ملهاش شرح يعني انت لو عندك عزيمة واصرار انك تغير من شكلك وتلبس الهدوم الي علي مزاجگ وتبقي صحتك كويسة زي الناس الطبيعية هتكمل و هتاخد القرار وتخس
فالبداية متسمعوش كلام الام المصرية الفاضلة ال تقولك انت عاجبني كدا ووشك زي القمر? شجع بيتك ودلوقتي والدتي بقت هى الي مشجعاني عالدايت ربنا يخليهالي?
نيجي بقي لموضوع الدايت انا تابعت مع دكتور اسمو دكتور محمود عزمي محمود من اشهر دكاترة الدايت عندنا ف الزقازيق ربنا يباركلو🙂 وهديكو النصايح دي
ممنوع المقليات والمحمر والمسبك والرز والكريب والبيتزا والبانية والبرجر والحواوشي والشورما و خلافو … صاحبك بقي صديق السوء ورفيق الدرب لو جية يقولك تعالي نضرب كريب … طب ماتاخدلك حتة شاورما سوري ? سندوتش كبدة وسجق كل دة ممنوع?
ممنوع الدهون والزيوت كلها والفاست فود والمياة الغازية
الفاكهة مسموح بيها ماعدا الانواع التالية : “مانجو / موز / بلح / تين / عنب / بلح”
المسموح بيه والمتاح حاليا “تفاح / برتقال / جوافة / يوسفي / جريب فروت وهكذا”
فالاول انا كان وزني ١٢٩ كيلو وبقيت ٩٧ كيلو دلوقتي واللي وزنو تقيل زي حالاتي ف الاول هيبدا بكميات كبيرة يعني اول نظام ليا كان ٨ معالق فول و نص رغيف بلدي وسلطة
او ٥ معالق جبنة لايت و ٢ عيش توست وسلطة
والغدا كان لحمة او فراخ او سمك باي كمية
وسلطة وطبق خضار سوتية
اللي وزنهم اقل بالذات البنات يبداو بكمية قليلة يعني خمس او اربع معالق ويقللو الكمية بالتدريج
فالاول بتلاقي نفسك خسيت كتير يعني خمسة كيلو ف عشر ايام لان الي بتنزلو ف الاول.دة بيبقي مياة نازلة من جسمك وبعد كدة معدل النزول بيقل لان الي بينزل بعد كدة دهون والدهون صعبة في تخسيسها وتكسيرها
– كل نظام دايت بتعملو كل عشر ايام واليوم ال ١١ يوم فرري كل فية كل ال انت عايزو بس مش تفتري يعني عشان متضيعش مجهود الايام الي قبلو
– بعد كدة بقيت بقلل الكمية يعني ٦ معالق بعدين خمسة بعدين اربع معالق… مرحلة اربع معالق دي بتوصلها لو وزنك تقيل اوي بعد حوالي اربع شهور
– اللي وزنهم اقل يبداو ب ست معالق ف الكمية لحد مايوصلو ل اربع وتلاتة
– الرز والمكرونة لو نفسك فيهم اوي يبقي بالكتير تلات معالق مع الغذا
– العشا ممكن تتعشي فول زي الفطار او جبنة لايت او اجمل عشا بقي زبادي لايت بليمون و فاكهة ثمرتين مثلاًً
– ممكن فالفطار لو مبتعرفش تعمل فطار تفطر خمس قطع بسكوت شاي و كوباية شاي بلبن او تلات قطع بيتي فور مكان البسكوت او قطعتين كعك
– بعد فترة هتقابلك مشكلة هتلاقي بطنك صغرت ومبتقدرش تاكل ف اليوم الفري ودة امر طبيعي جدا جدا والي بيحصل دة هو اللي بيعودك انك متكترش ف الكميات وتعيش حياة مظبوطة وسليمة
– المسافة بين كل وجبة والتانية من ٤ ل ست ساعات
– السناك بين كل وجبة والتانية بتكون دايما علبة عصير او ثمرة فاكهه
– بعد ماتخس كتير وتبقي ف وزن ١٠٠ كيلو مثلا ممكن تفطر ٤ معالق فول او ٣ معالق مربي و ٢ عيش توست دا فطار جميل
– مسموحلك بالعدس مثلا او التونة بكمية ” طبق وسط عدس” و علبه تونة متصفية من الزيوت
– الغدا دايما بيكون ثابت يعني نص فرخة او نص كيلو سمك مشوي او شريحتين لحمة مشوية
– بعد كدا الكمية بتقل بتبقي ربع فرخة و نص كيلو سمك او اقل ومعاهم سلطة وطبق خضار ده ف الغذاء لان العشا والفطار ثوابت انت بس بتقعد تشقلب ف الاكل علشان متزهقش ?
– ممنوع النوم بعد الاكل مباشرة عشان الاكل ميحصلوش ركود ف المعدة
– ممنوع شرب مياة اثناء الاكل عشان ميحصلش عسر هضم وفي اليوم لازم تشرب ٢ ليتر مياة عشان بتسرع امتصاص الاكل
– لو حسيت بالجوع ف اخر يومك مسموحلك ب ثمرة فاكهة او سلطة زي الخيار والخس
– نصيحة متكسلش واوعي تزهق ف النص الموضوع مضمون محتاج صبر وارادة والنتيجة روعة زي ما شوفتو فيا وفي غيري من اللي عملو دايت ?
– اوعي تكسر الدايت ف النص وتاكل اكلة تقيلة هتدفع تمنها غالي … اليوم اللي بتكسرو بعشر ايام بيضيعو والوزن بيزيد بغباء
– لما توصل لوزنك المثالي او قبلها بشوية ممكن تلعب جيم كارديو الي هو تجري ع المشاية … ممكن تلعب سويدي وحديد وتعمل جسم مفيش مشاكل عشان جسمك يشد ويتظبط
– ابعد عن اصدقاء السوووء ونفسك الضعيفة وخلي عندك ارادة شوف النماذج الايجابية اللي عملت دايت واعمل زيهم وخلي عندك طموح توصلهم ?
– لو حصلك اكتئاب وانت بتعمل دايت اتغلب عليه باي حاجة اخرج مع صحابك اسمع اغاني .. روح رحلة اعمل اي حاجة تشغلك عن الاكل لان الاكتئاب بيعمل مرض شراهه ف الاكل فعلا ?
– وموضوع الدايت والبوستات الي نزلت عالبيدجات دة عشان تتشجعو مش عشان الواحد يتمنظر بنفسو او يفتخر انو عمل دايت … بس انتو مش متخيلين مدي معانات الناس التخينة والكلام الجارح الي بيستقبلوه من صحابهم … راعو مشاعر غيركم ف الكلام ?
– اخر حاجة هكلمكم عنها … (مابعد الدايت)
– بتخش ف مرحلة اسمها التثبيت ودي اصعب من الدايت نفسو لان محتاجة ارادة اقوي اللي بياكل كتير بعد الدايت بيتخن الضعف …
– نصيحتي ليكو تمشو نظام اكل غذاءي زي الدايت بالظبط ممكن تكترو ف الكميات شوية بس ليكم كل ست ايام يوم فري تاكلو من برة بحدود
– انما انت اصلا اللي خلاك تصبر شهور وسنة عشان توصل لنتيجة الدايت هيخلي عندك دفعه كدة انك تفضل عايش لايف ستايل صحي ومتاكلش اي اكل والسلام
– واللي هيتخن ف مرحلة التثبيت يبقي اكنو ولا عمل حاجة وراحت فلوسو ف الارض و هيتصاب باليأس تاني ف بلاش توصلو للمرحلة دي احسن ?
– ربنا معاكم كلكو و يساعدك ويقوي ارادتكم و يارب كل واحد نفسو يوصل لنتيجة حلوة ف الدايت يوصلها 🙂
– البوست هو شير لكل الناس اللي محتاجة تعمل دايت 🙂 ساعدو غيركو قبل نفسكو وحبو الخير للناس
– البوست هينزل علي صفحة الجمهورية اليوم علي مساعدتو ليا في نشر افكاري 🙂
– لو اي حد محتاج سؤال او توضيح ف كلامي يتفضل يسأل
– كمان هنزل كل شوية نصايح اكتر عن الدايت وتقوية الارادة
– تابعو صفحتي وتحت امركو ف اي وقت 🙂
– كمان في فكرة حلوة اللي هيتشجع ويعمل دايت وينجح فيه يتفضل مشكوراً يبعتلي صورتو قبل وبعد الدايت انبوكس كنوع من التشجيع للناس كلها 🙂 يلا نشوف العزيمة والناس الحلوة اللي عندهم ارادة من حديد ?
– احب اشكر كل الناس الي شجعتني ع الدايت والدكاترة بتوع ربنا يباركلكم كلكو ?
– شكراًً ليكم واتمني اكون قدرت اساعدكم 🙂 وادعولي ربنا يوفقني ف حياتي محتاج دعواتكم …. شكراًً ليكم ??
  
Facebook Comments

شاهد أيضاً

تجريع أكثر من ٥٦٠ ألف مواطن بحملة البلهارسيا بالشرقية حتي الآن

عبدالحميدشومان ننشر لكم و لليوم الثاني على التوالي واصل عمال إحدى الشركات المتعاقدة مع قطاع …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *