الغربية …عبده البربرى
كل اكتوبر يفكرنا بفرحة النصر و يرجع لينا الاحساس بالوطنية و الانتماء
كل عام واحنا بنعرف الاجيال الجديدة يعنى ايه اكتوبر و يعنى عبورو كرامة وطن ويعنى ايه وقتها كان كل بيت او شارع فيه شهيد و فرحة نصر و حزن على فراق ابن و اخ و زوج و اب
……………..
زغروده ف إيد زغروده أكيد
ومافيش زغاريد من غير أسباب
أكتوبر هل وهل العيد
يوم سته رجعتي يا مصر شباب
***
كنّا العايشين … ييجي ست سنين
بنلم جراح سبعه وستين
وبنبني الجيش .. حالفين ع العيش
ما نعيش غير واحنا المنتصرين
يوم سته الضهر ف عز صيام
الجو صقور تصطاد ف نعام
والأرض أسود وزئيرها بارود
ف ساعات عوّضنا الست ايام
وف سينا رفعنا النصر رايات
تكبيره كبيره شهيد وأيات
وما عدّى اليوم غير أرض النور
رجعت أحضان الأم تبات
سلامات للجيش .. أبطال الجيش
ولشعب اختار بكرامه يعيش
زغروده يا مصر وما تبصّيش
على أي كلام اتقال كدّاب
زغروده ف إيد زغروده أكيد
ومافيش زغاريد من غير أسباب
أكتوبر هل وهل العيد
يوم سته رجعتي يا مصر شباب
***
إفردي دراعاتك ياللا قوام
على كتف ولادك برج حمام
ح تعدّي جبال وحدود وسدود
الكل جنود خطوّه لقدّام
الزرع ح يبقى سنابل خير
ومصانع تنتج بالقناطير
رح تبقى الصحرا بإيدنا عمار
بجناح اكتوبر كُلُّه يطير
أكتوبر على طول الأيام
جوّانا ح يبقى قلم وكتاب
زغروده ف إيد زغروده أكيد
ومافيش زغاريد من غير أسباب
أكتوبر هل وهل العيد
يوم سته رجعتي يا مصر شباب
…………..
الاغنية تحية منى لكل جندى حارب فى اكتوبر ورجع لمصر كرامتها و تحية لكل شهيد ساهم بدمه فى رفع راس مصر
#هناء #جــوده
هنــــــاء جـــــوده …تحيى جنود وشهداء مصر بانتصارات اكتوبر
