… حمرت عينها …
……………………..
انا كنت في الجنه
سعيد ….. ومتهني
جت حوا تتمنى
تفاحها ….. جنني
زنت على دماغي
شيطانها جاب داغي
ونزلت انا ع الأرض
ألطم على صداغي
على دينها لساها
انفاسي ….. عداها
قصقصت … ريشي
وجيوبي … شقاها
خايفه لاطير منها
والوف على غيرها
سدت بيبان العش
وحمرت ….. عينها
قولتلها نفسي ارتاح
واكل من التفاح
وافتكر ….. خيبتي
قالتلي حلم وراح
أنا حابسه انفاسك
وهاسن ليك فاسك
لو رمش عينك رف
هاقطع بيها راسك
وابص في عيونها
أشوف حنان منها
أحلف بعهد الله
ظلماني ….. بظنونها
وانا اللي من صفها
حاسس انا بضعفها
أسمع كلامها واقول
دا من ورا قلبها
أنا أصلي باعشقها
وادوب في أشواقها
زي القطط في الطبع
بتحب …… خناقها
زي القطط في الطبع
بتحب …… خناقها
……………………….
بقلمي الفلاح الفصيح
معوض حلمي
منشأة بطاش
تمي الأمديد
دقهلية
