شهادة حق

قتل وتحرش واغتصاب وسرقة ووووالخ كتيير من الحوادث اللى كلنا مش قابلنها ولا عايزين نسمع عنها تانى بس للاسف بنتفاجئ انها بتتكرر مرة واتنين والف وهكذا وهكذا …،

واخرهم قضية محاولة اغتصاب فتاة البامبرز كما يقولون

والكل بيطالب بالاعدام ليه .. وانا كمان بضم صوتى لصوت كل اللى طالب بالاعدام .. وعمرى ما انسى حادثة البنوتة اللى زى القمر زينة الله يرحمها ويصبر اهلها .

بس وبعدين ..،

هنعدم كام شاب ولا كام راجل وهنفضل نعدم فى الشباب لحد امتى

ليه ما بنفكرش فى اساس المشكلة واسبابها

واولهم طبعا غياب الدين والاخلاق والقيم والقدوة بين الناس

وتانى حاجة صعوبة الجواز للشباب وبقى الشاب بيوصل لسن التلاتين والاربعين كمان ومش عارف يتجوز ولسة قاعد فى بيت اهله

ده مش عشان غلو الاسعار هى لو الفلوس موجودة مش هتفرق الاسعار لكن الفلوس اساسا مش موجودة

ومفيش تسهيلات فى اى شئ عشان الجواز

ارجووووكم انا بطالب الاعدام لكل مجرم يحاول ان يغتصب حلم اسرة كاملة ببنتهم

وبرضه بطالب باعدام العراقيل والمشاكل الصعبة اللى بتقف قصاد الشاب والفتاة عشان يوصلوا لعش الزوجية

سهلوا امور الجواز .. ياريت اهل العروسة يبطلوا يطلبوا طلبات مبالغ فيها من الشاب

اهم حاجة الشقة لكن التفاصيل اللى جواها هما حريين فيها بالاتفاق وبالتراضى جيبوا الاساسيات بس وبعد كدة هما هيكونوا حياتهم وهما مع بعض وهما حريين فى نفسهم ان شاء الله يقعدوا على حصيرة زى زمان.

والناس اللى كل سنة ما شاء الله عليهم بيطلعوا عمرة او حج .. ياريت تساعدوا الشباب تتجوز ساعدوا فى ستر بنت وستر شاب ومنعهم من الانحراف الاخلاقى اللى فى الاخر لو غلطوا بنطالب باعدامهم

وعايزين جمعيات بتساعد الشباب والبنات لتسهيل احتياجاتهم مش لازم تكون ارملة او مطلقة او يتيمة عشان تساعدوهم ، فى ناس كتير محتاجة ومش عارفة تعيش .

الموضوع مش فى الحكومة …

الموضوع فينا احنا .. محتاجين نحط ايدينا فى ايدين بعض ونبقى قلبنا على بعض ونساعد بعض بجد ومحدش يقول يلا نفسى.

وبطالب الاعلام والمسئوليين عن انتاج المسلسلات والافلام اللى قلبت كيان الشباب والبنات والاسرة العربية بشكل عام ..

كفاية ابتذال فى المشاكل اللى كلها خيانة وهروب واغتصاب وزنا المحارم وقتل الاب والام ورميهم فى الشارع .

عايزين نشوف مسلسلات نضيفة فيها بر الوالدين ، فيها الزوجة المخلصة والزوج المخلص فيها الابناء المتربيين فيها صلة الرحم فيها احترام الجار والمحافظة على الصاحب.

عايزين نشوف برامج دينية بتعلمنا الدين بشكل سليم

كفاية ارحموا شبابنا وبناتنا اللى بتقفلوا قدامهم كل الابواب عشان يغلطوا ولما يغلطوا نطالب باعدامهم ..

وحسبى الله ونعم الوكيل عليه توكلت وهو رب العرش العظيم