أنا عشت نص عمري تقريبا بجر في العرية دي وبشتغل وسط الرجالة علشان اجيب لقمتي بالحلال”، هكذا بدأت منى السيد 40 عامًا حديثها مضيفة:”انا مصدقتش لما قالولي ان صورتي منتشرة على مواقع الفيسبوك، وبعدين لقيت الإعلامي عمر أديب بيكلمني ففرحت جدا ان فيه حد بيقدرني كده”.
وأضافت السيدة: “انا اتعلمت لحد سنة رابعة ابتدائي بس مش بعرف اقرا ولا أكتب، ومن صغري نزلت اشتغل في السوق علشان اجيب لقمتي من عرق جبيني وبالحلال”، مضيفة:” أنزل من الساعة 8 الصبح وبشتغل في توزيع المنتجات الغذائية من تجار الجملة بالمنشية وبحري على الأكشاك والمحلات وبفضل اجر العربية لحد العشاء وبعدين اروح”.
وتابعت:”ربنا بيقويني على لقمة العيش انا بعمل اللي عليا وبسعى، مشيرة إلى انها تلاقي تشجيعا من التجار والأهالي بالسوق ودعوات كثيرة على غرار “روحى ربنا يسهلك، ويسترها معاكى دنيا واخرة”، مضيفة:” الناس كلها بتحبنى والتجار بيتعاملوا معايا كويس”.
وانتقدت السيدة الشباب الذين يفضلون الجلوس على المقاهي عن العمل قائلة:”الشباب اللى بيقعد على القهاوى دول بياخدوا فلوس من اهاليهم، ومش بيجروا على لقمة عيشهم، هؤلاء لابد ان يسعوا ويتعلموا الاعتماد على النفس”.
وعن أمنيتها “قالت:” انا عاوزة افضل اشتغل لحد ما اموت، وكمان عاوزة الستر والصحة من عند ربنا”.
