الشاعر اسكنر عوض
طفل خمس سنوات مفيش غير امه معاه
ابوه من سنه مات و هيا بس وياه
هيا كل ما ليه ف دنيا قاسيه ظلماه
من البرد تغطيه ف المرض ترعاه
وهبه حياتها ليه و عمر ما قالت اه
حلمها تربيه كأن ابوه رباه
الام و ابنها ف حلم جميل عايشين
يجيبوا اللقمه يكلوها يقسموها لاتنين
ميعرفش الولد ياكل غير لما تبوسه بوستين
و هوا كمان يبوس راسها و يبوس ايديها الاتنين
تقوله كلت يا عمرى ناقص كمان حاجتين
كوب اللبن تشربه و اديك كمان بوستين
يقول يا امى هشربه و ابوس كمان الايدين
نغم جميل عايشينه و حب جميل بينهم
فرحانين الاتنين و راضيين بحالهم
مايعلموش الغيب و ايه الغيب مخبيلهم
الام مرضها خطير ولا هما على بالهم
ان المرض لعين هيفرق كمان بينهم
راحو لاطبا كتير قاله صعب تعيش
اصل المرض ساكن و علاج ليه مفيش
الام خلاص ماتت حتى النفس مفيش
شده الاطبا ملايه على الوش بشويش
طفل الخمس سنوات بيشيل الملايه
و يقول يا امى قومى متناميش
هوا انتى يا امى ليه مبترديش
ماسك الولد ماسك ف ايد امه
ويهز ف ايديها فاكرها هتقومله
زقو السرير بالعجل و بعدو الولد عنو
جرى الولد و وقع قال الولد لامه
قلبك قسى كدة ليه عمرك ما سبتينى
اققع و متجريش بايديك تشيلينى
منك انا زعلان بسرعه تعاليلى
و ناقص كمان حاجتين اوعى تنسينى
كوب اللبن اشربه علشان تبوسينى
طبيب سمع الولد حن قلبه عليه
اصل الولد كان عوض ربنا ليه
فرح الطبيب بالولد و قال اربيه
كبر الولد ف حضنه كبر قدام عنيه
صبح الولد طبيب الكل يحلف بيه
حلف الولد لايزور يزور قبر امه
واخد كوب اللبن و ف ايده بيضمه
راح الولد هناك وقال الولد لامه
كوب اللبن مليان و هشربه كله
وداع يا احلى ام حضنتنى خمس اعوام
هما عمرى كله
