كتبت / دكتوره شيماء دسوقي
عايزه ولادك يبطلوا يغيروا من بعض ؟!
يبقى نبطل نقارنهم ببعض ،، و نبطل نحسسهم انهم أنداد لبعض ،،
نبطل كلام من نوعية شايف اخوك خلص اكله و انت لأ ،، شايف اختك حلت الواجب و انت لا ،، نبطل نخلق جو المنافسه (الوهمية) ده ،، و هما هيبطلو غيرة
* عايز ولادك يبطلوا يغيروا من بعض ؟!
العب معاهم لعب تعاوني
مش لعب تنافسي
يعني مش نلعب عشان نشوف مين فينا هيكسب ،، لا ،، احنا لعب مع بعض و نشوف هنقدر نخلصها اللعبة في الوقت المحدد و نكسب مع بعض ولا لا ،،
* عايزة ولادك مايغيروش من بعض ؟
يبقى علميهم يساعدوا بعض و يشتغلوا مع بعض ،، في كل حاجة ،، من اول المذاكرة مرورا باللعب ،، و حتى المهام المنزلية
* عايز ولادك ميغيروش من بعض ؟
يبقى تاخد بالك و اوعى تفضل واحد فيهم على التاني ،، ولا تحابي واحد فيهم على حساب التاني لأي سبب من الاسباب ،، متقولش اصل ده صغير ،، اصل ده غلبان ،، متبررش لنفسك اكبر خطأ فادح ممكن ترتكبوا في حق اولادك
* عايزة ولادك ميغيروش من بعض ؟
يبقى متعمليش حاجتين :
متغاليش في مدح حد فيهم قصاد الباقي
متعنفيش حد منهم قصاد الباقي
* عايزين ابنكم مايغيرش من اخوه ؟
يبقى تبنوا ثقته في نفسه الاول ،، و تعرفوه ان حتى لو اخوه متفوق عليه في حاجة ،، فده مش معناه انه احسن منه ،، تفهمه ان كل واحد بيتفوق في حاجة مختلفة و ده مش معناه ان في حد احسن من حد
و اخيرا لازم نبقى كلنا عارفين ان الغيرة دي حاجة طبيعية جدا و شعور انساني الطفل مالوش ذنب فيه ،، احنا اللي ب إيدينا نزوده و ننميه بتصرفاتنا الغلط مع ولادنا ،، او نثبطه ،،
ابنك طبيعي يغير ،، مش عشان هو وحش او فيه حاجة غلط ،، غالبا الغلط ده احنا اللي بنخلقه
