اسكندرعوض
واكلين شاربين مع بعضينا
حاشر نفسك ليه وسطينا
عايز تعمل فتنه بينا
ولا تكون واصي علينا
عارف ان اخوك محمد
راضع من ام مينا
والاثنين كانو علي الجبهه
واقفين بيحمو اراضينا
مين زرع الغل في قلبك
خلاك بتقتل فينا
عساكر صايمين رمضان
رايح تقتلهم في كمين
وعساكر علي الجبهه تموت
لوطنهم خدمه واقفين
اطفال في كنيسه بيصلوا
بتفجر فيهم يالعين
دول ودول عملولك ايه
مكانوش بيحاربوك في الدين
ياسلام علي قمه ايمانك
دي عمايل مؤمينين
هو كده ترضي ربك
فاضل ايه يرضي الشياطين
علي وسطك حزام ناسف
وفايدك خنجر يالعين
ورايح تقتل مش عارف
انت رايح تقتل مين
مسلم ميسحي ولا همك
لا ليك اصل ولا دين
معرفش ازاى لغو عقلك
خلوك زي المجانين
رايح كده تفجر نفسك
وتموت في بنأدمين
وتقول علي نفسك مؤمن
طب انت مؤمن بمين
يلا يا عاقل انسف نفسك
عشان تروح للعاقلين
مهو ضحكو عليك في الدنيا
وفي الاخره مستنين
امال حبيبهم جالهم
شيطان زي الشياطين
يعينا ربنا عليكم
وعلي كل ارهابي لعين
وبكره في الاخره هتعرف
انك خسران دنيا ودين
