يا كل قادر و فى إيديه صنعة أو مهنة
و يا كل تاجر مرتاح و مستور و فى عملك ناجح
و غيرك من الإحتياج مقهور و يا كل رجل أعمال الدنيا ضحكالك خللى بالك فيه كتير لهم حق من الله معلوم فى مالك
ناس فقيرة و غلبانة و الضحكة عن وشوشها غابت ناس مستنية حد يمسح دمعتها من مرض هلك صحتها ولا انت شاغل بالك و للا بنت طاهرة و عفيفة نفسها فى الستر زى بنت جارتها
بيوت كتير مقفولة مليانة حزن و هم و و لاحد بيحس بيها و لما صدفة حد يقابلها تحاول ترسم على وشها بسمتها
يادكتور يا أبو سماعة مفيش مرة سمعت أنين قلب فقير حزين فى سماعتك و للا حتى سمعت صوت صرخة من بين ضلوع معهاش تمن الدوا أو حتى تمن الكشف
و يا أستاذ يا إللى لابس رداء العدل أكيد قابلت فقير مظلوم من الزمن و الناس و لا حتى أرملة بتربى فى يتامى و نفسها تعشيهم إن شالله عيش حاف ياريت تكون عليهم أرحم من الظالم والظالمين إللى سافين حقوق الناس بالألفوات و الملايين
و يا صاحب الهامر و القصر و العقارات و فلوس كتير فى البنك و متلمع عالشاشات.. اللهم مالا حسد لكنها كاسات … ازرع ليوم تحتاج فيه حسنة وزن الخردل أو حتى جبال حسنات
أطفال كتير مرضى و الأكتر كمان حافيين و يتامى ياما و كتير كمان مساكين ..
هما صحيح عايشين لكن أحياء فى عداد الميتين نفسهم فى بيت يسترهم و للا سقف يحميهم من شتا يغرقهم أو شمس تكويهم
يتمنوا شربة مايه نقية أو لقمة نضيفة هنية أو كسوة حتى عادية
ضحكة المحتاج فى الدنيا ستر لك فى الأخرة و حسنات كتير مكتوبة و عند الله محسوبة
و اسمع كلام سيدى و سيدك خيركم خيركم لأهله و انا خيركم لأهلى… و أحاسنكم أخلاقا أقرب منى مجلسا
صلى الله عليه و سلم
