? همسات نانا ?
انا كبرت خلاص كبرت بجد…!؟
عرفت اني كبرت اما اتبدلت صفاتي ،،،
اتعلمت خلاص مقولش اللي انا حاساه..
كبرت وبقيت اسمع اكتر ما بتكلم..
كبرت وبقيت ارد في سري بكلام كتير ومنطقش ب ولا كلمة..
كبرت وبقيت اعرف اضحك اللي قدامي في عز منا لسه مخلصة عياط ومحدش بيعرف كده غيرى..
كبرت وبقيت اكبر دماغي م التفاصيل واقول لاصحابها تمام تمام حصل خير..
كبرت واتعلمت اسيب ايد اللي عايز يمشي من غير عياط..
كبرت وبقيت اجيب المشكلة فيا بدل ماقول كلام هيظلم مشاعري ومش هيكفي اللي جواياها ..
كبرت وعرفت قيمة نفسي من غير ماحد يوصفهالى..
كبرت وعرفت ان الحب المثالي في الافلام القديمة..
كبرت ومبقيتش احط كلمة “بيحبني اوي” ضمن المميزات….
عشان انا استاهل اتحب..
كبرت وبقيت اعرف اشغل نفسي واقويها عشان معملش مكالمة وحشني صوت اصحابها اللي ميعرفوش التقدير..
كبرت وبقيت ابعد عني اي حد هايجيبلي وجع الدماغ..
كبرت ومبقيتش ازعل لما اتشتم من حد جت سيرتي قدامه..
كبرت وبطلت افكر الناس هتقول ايه عني واجرى ادور علي رضاهم..
كبرت واتعلمت ابين اني مستمتعة جدا بدور الصديقة المقربة وانا عارفه نوايا اصحابها تمام..
كبرت ومبقيتش ازعل من صحابي اما ينسوني …
وبقيت انا العاقلة الوحيدة اللي بيجروا هما عليها “وقت اللزوم”..
كبرت واتعلمت ان الاستغباء ذكاء بيعرفني بسهولة معدن الممثلين حواليا..
كبرت واتعلمت ان محدش فيها باقي ومفيش حال بيدوم..
كبرت وعرفت ان الاهل والقرش هما السند الفعلي مش الراجل ولا الصحاب..
كبرت وبقيت اتونس بوحدتي اكتر م الناس لأ وبنزل افسحني..
كبرت وبقيت اشترى حاجتي بنفسي مباخدش حد معايا..
كبرت وبقيت منامش قبل ماخد حقي من اي حد بيحاول يتعدي عليا ف الشارع بالكلمة ولا بالنظرة ..
كبرت واكتفيت بحواديت الناس اللي بتأكدلي اني في غنى عنهم وان الوحده اهدي وارقي بكتير..
كبرت وبقوا يحسدوني علي سفرى لوحدي وحريتي اللي لا بتأذى ولا بتسمح لحد يأذيها..
كبرت وبقيت اقرا الناس من عينيهم بشكل واضح اوي ..
كبرت اوي وكل اللي اتغير فيا حاجات حلوة اوى بس للاسف علي قد مافرحتني تعبتني …
الفهم الزايد مبيوجعش غير صاحبه اولا وبيخليه يبص للواقع بوضوح والواقع ميقلش عن الغابه فى شئ ….
كبرت وياريتني ما كبرت ….
