نشرت الدكتورة هاجر عصام الصيدلانية بالمعهد القومى للأورام، عبر صفحتها على فيسبوك تعليقًا حول حقيقة ماحدث فى المعهد،قائلة: “طب يا جماعة بس للتوضيح يعنى، انا بهاتى من اسبوع او اكتر انا و زمايلى و ادارة الصيدليات فى ان اللى بيحصل دة غلط و كدة هيبقى المعهد بؤرة لتفشى الكورونا و لازم حضرتك تاخد اجراء باغلاق المعهد (١٤ يوم اللى هى فترة حضانة الڤيروس عشان لو حد اتعدى يبان عليه) و تطهيره بالكامل و بعدها ننزل المعهد بعد ما يعملولنا كلنا screening و يتأكدوا ان محدش عنده كورونا عشان كدة احنا بننشر المرض عشان بيجيلنا مرضى من كل انحاء مصر، بس كنت بنزل لخدمة المرضى انا و زمايلى -و واخدين كل احتياطاتنا اللى وفرتهالنا ادارة الصيدلية و تشكر طبعا عليها- عشان ملهمش ذنب فى اللى بيحصل”.
واستطردت:” المهم اننا اجتمعنا امبارح “الخميس ٢ ابريل” مع عميد المعهد دكتور حاتم ابو القاسم بناء على طلبنا من مديرة الصيدلية اللى طبعا شاكرة اخدت منه ميعاد عشان نوصل صوتنا، و فعلا قولناله اننا عاوزين المعهد يتقفل للتعقيم و الناس تقعد فى بيتها اسبوعين (اللى هى فترة حضانة الفيروس) لحد ما نعرف بس لو حد تعبان او بانت عليه اعراض، و هو طبعا رفض و بشدة و كان رده عليا لما قولتله ان احنا كدة بنئذى بعض و المرضى و بلد كاملة انه يقول لى: “لو خايفة على نفسك من الكورونا يا دكتورة اتفضلى قدمى استقالتك و متجيش”.
و رده على ناس بتناقشه ان الصيادلة رافضين ينزلوا غير لما يتم تعقيم كامل، ان “لو الصيادلة مش هينزلوا هناخد اجراء ضدهم و لو كلهم مش نازلين مش مشكلة هنجيب غيرهم”.
دة كان رده امبارح اللى هو كان الخميس ٢ ابريل.. كان يوم شغل عادى جدا وكلنا نزلنا الشغل عادى بردو، تمام؟
وردًا على ماقاله مدير المعهد في مداخلة هاتفية مع الإعلامي عمرو أديب، قالت:
اولا: د/حاتم ذكر ان اتعمل مسحة كاملة على المعهد، دة يا جماعة محصلش و ربنا يشهد على كلامى. متعملش حتى مسح لكل للمخالطين بأول حالة شوية منهم بس اللى اتعمل لهم مسح و الباقى اتعزلوا فى بيوتهم و الله اعلم مين تانى كان اتعامل معاه بس ميعرفوش بالاسم لان المعهد حلقة و كلنا بنتعامل مع بعض ب شكل او بآخر (يعنى اكيد فيه carriers ماشيين وسطنا كلنا و بختلطوا بكل الناس).
ثانيا: د/حاتم ذكر انه تقرر غلق المعهد ٣ ايام حتى يتم تطهيره، مش دى المشكلة، المشكلة انه بيقول ان المعهد اتقفل ٣ ايام منهم يوم كان اصلا شغل عادى و اليوم اللى اجتمعنا معاه فيه عشان نطلب منه يقفل المعهد عشان الموضوع ميكبرش و هو اصر انه مش هيقفله بس قال هيجيب شركة تعقم المبنى قبل الشغل يوم الجمعة (اللى هو اجازة صيدليات الصرف بس فيه ناس كتير قدروا ينزلوا يفتحوا و فعلا اتعقمت بس انا صيدليتى متعقمتش عشان محدش فينا عرف ينزل الجمعة) ف لأ الكلام اللى مكتوب مش صح ولا الاجراءات دى اتتاخدت ولا كان عاوز يسمع حد فينا و كان قراراه محسوم بان الشغل مستمر و اللى مش هييجى هيتتاخد ضده اجراء و اللى مش عاجبه سياسة المكان يتفضل يقدم استقالته.
