قصيدة وآه يامه..
للشاعرة رباب قاسم..
وآه يامه..
انا المحتاجة للضمّة.
ومشتاقة أوي يامه…
تضمّيني
وأحكيلك..
وتحكيلي..
كلامك كان يريحني وبينورلي قنديلي..
وحشتيني..
وحشتيني أوي يامه..
وحشني صوتك الدافي..
ولمّا كنتي تدعيلي..
تناديلي..
تقولي تعالي يا بنتي..
تعالي اقعدي جانبي..
وأشكيلك وتشكيلي..
دا بكرة تدوّري عليَ وتتمني تلاقيني..
وسبتيني..
وسبتيني أَوام يامه..
أدَوّر في الفضى عليكي..
واقول يمكن ألاقيكي..
وملقى غير صدى صوتي رجعلي لمّا اناديكي..
سعتها قلبي يوجعني..
ودمعي كمان بيعصاني ولا يرضاش يطاوعني..
تعدّي اللحظة والتانية..
والقى روحك الحلوى جيالي تنوّر الدنيا..
وألقى الدنيا بتنور..
وحزني كمان بيتغير..
ويصبح فرحة يامّايا تطمن قلبي انا عليكي..
تقولي مليكا خدّامي..
وجنة تحت أقدامي..
أقول يا امّا جزاء صبرك ورحمة ربنا بيكي..
