كلمات الشاعر/السعيد الحديدي …
أنا جاى أشكيلك يا حماتى
بنتك والفيس تعبو حياتى
الفيس واخد عندنا حقه
وليل ونهار واخد وقته
عايش بمزاجه وبراحته
وبيتنا .. متلخبط حالته
وجاى أشكيلك يا حماتى
تشوفيلك صرفه مع مراتى
من يوم الفيس ما دخل بيتنا
واحنا الإهمال جه فى حياتنا
لا نظام ولا ترتيب فى عيشتنا
وجاى أشكيلك يا حماتى
تشوفيلك حل مع مراتى
مراتى ع الفيس للفجريا
وتفضل نايما … للضهريا
واولادى بيصحوا الصبحيا
ومين هيفطرنا يا حماتى
متشوفى صرفه مع مراتى
يا حماتى بنتك مش فضيالنا
وعادت بتأهمل فى عيالنا
والفيس ده ملخبط أحوالنا
وانا جاى أشكيلك يا حماتى
تشوفيلك صرفه مع مراتى
مراتى الفيس . كل حياتها
شاغلها . وشاغل أوقاتها
وأهملتنى …. أنا وعيالها
مصالحنا ما عادت وعيالها
وجاى اشكيلك يا حماتى
تشوفيلك صرفه مع مراتى
امبارح انا راجع من شغلى
عايز آكل وارتاح من تعبى
لقيتها بتبدأ …. تطبخلى
وتقولى انا آسفه يا حياتى
فجيت اشكيلك يا حماتى
تشوفيلك حل مع مراتى
اليوم دا انا قمت الصبحيا
جهزت فطارى . أنا بإديا
وملقتش هدومى مكويا
زملائى عملوا .أجازة ليا
جبتيلك بنتك .. يا حماتى
لا هيا لا الفيس فى حياتى
وخليكى عند امك يا مراتى
