عيشة زمان …..
بقلم انتصار حسين
……..
كان مالها العيشة دية
كانت دنيا جميلة هنية
راحة بال والهم مُحال
لا فكر يعكر صفوها
ولا حاسبين حسابات لها
هي لقمة بسيطة هنية
وهدمتين أو جلابية
وصلاة والفجر بيشقشق
ونسمة تحيي العليل
في ساعة الصبحية
عيشة هادية…..
مليانة رضا……
وسمانا صافية ….
مافيها بُكي….
كان مالها العيشة دية
كانت دنيا صافية هنية
بالأهل والجيران مليانة حياتنا
وقعدة معاهم المغربية
شوية شاي قدام الدار
قاعدين لمة كل جار
نحكي حكاوي زمان
ويسمعها معانا الصغار والكبار
وتفضل السِهراية طول الليل
وليالي سمرنا مافيها غُدار
القلوب صافية….
والنفوس بالطيبة دافية
والبركة دايما محاوطانا
والعافية دايما ملازمانا
ويطلع النهار علينا كل يوم
جايب معاه رزقِنا
شايل معاه فرحِنا
وبالعمل يوماتي ننام ونقوم
لايوم كَلينا…..
ولغيرنا بصينا….
وقعدنا نبكي ….
ع اللي جرى لينا….
يوماتي مشغولين بنفسينا
وواخدين بالنا من أهالينا
لا أم يكبر عمرها نقوم ننسى فضلها…
ولا ابن يرفع عينه
في عين امه وابوه
وينكر كل اللي عملوه
ويجادله ويتعبه ويقول حقي
كنا بنخاف عليهم …..
وكنا بنكًَبر بيهم…..
ولجل ما نِعلى …
لابد ما نعلي إلا بيهم .
…….
كان مالها بس العيشة دية
كلها مودة كلها حنية
ونفوس صافية مافيها غِل
وقلوب بالطيبة عَفية
والله كانت عيشة هنية
كان مالها بس عيشتهم دية
……
