«لا يصِحُّ أن تُخيطَ جرحَكَ دون أن تُنظِّفه»
بقلم الدكتورة/سمر مجاهد
إستبدال العلاقات فخ قد يدمر شخصاً ليداوي شخصاً أخر وطبعا كلامي هنا عن العلاقات العاطفية سواء إرتباط شرعي أومجرد خطوبة أوعلاقة حب كان يؤمل إتمامها بصياغ شرعي ولم يُكتب لها التمام، مع الاسف أشخاص كتيرة بيقعوا في الفخ ده تلاقي شخص لسه خارج من علاقة وسرعان ما يدخل بعلاقة أخري معتقد بأن تلك العلاقة شفائاً له من آثار العلاقة السابقة وأنه سوف يتجاوزها بدخوله في تلك العلاقة الجديدة سواء بقي داخل العلاقة دي مدرك ومستوعب ما يفعله ام لا، وكثيرا ما ننصدم بمثل تلك العلاقات في الواقع وغالبا ماحدثت أمام أعين الكثير منا في صور عده وحسب نوع العلاقة زي شخص مثلا تلاقيه لسه منفصل عن زوجته وسرعان ما يتزوج طبعا انا مش ضد شرع الله بس لابد من الحكمة والتعقل، خلق الله الانسان وميزه بالعقل ليزن أموره حتي لا يقع مرة أخري فيما هو أسوأ، فقبل ان تخيط جرحك لابد أن تنظفه فما يحدث ماهو إلا هروباً ولكن جرحك لم يتم شفائه بعد لانه مازال ينزف وان إلتأم علي هذا الحال سيظل ممتلئاً بالقيح الذي سيجبرك حتما علي إعادة فتحه ، وغالبا العلاقات السريعة دي بتكون بمثابة مسكن مؤقت أو كوبري للشخص ينسي من خلاله علاقته القديمة، وكمان هي علاقة بيكون فيها أحيانا حتة تحدي بترضي غرورك اللي هو أنا هاحب حد أحلى منك أو هابقى مع راجل أو ست أحسن منك وتبقى النتيجة اننا كتير بنكون ماشيين نتخبط في علاقاتنا وبيطلع في النهاية زي ما بيقولوا ما أسخم من زيد الا عبيد، وعلشان اكون منصفه في كلامي مش لازم الشخص اللي بيعمل كده يكون شخص سئ او ان هو مش كويس لا خالص هو فعلا ممكن يكون محتاج مساعدة أو مجروح أو مأذي أو محتاج مشاعر معينة وعشان برضه أكون صريحه ممكن نخرج من علاقة وفجأة نقابل شخص ويحصل انسجام وتوافق فعلا وبعدها العلاقة تمشي وتستمر وتنجح لكنها ليست قاعدة نخاطر من خلالها،
لان في علاقة جايز تكون مفيدة على المدى القصير، لكن أضرارها كبير على المدى البعيد.
وكلنا عدى علينا أقوال مأثورة من نوع.. “الحب بيتنسي بحب تاني”.. “الراجل بيتنسي براجل أحسن منه”.. “الست بتتنسي بست أحلى منها”، لكن أنا من وجهة نظري إن هذا المبدأ هو استغلال لشخص برئ ليس له ذنب أنت بتستخدمه علشان تبرأ من جرحك وتتعافي من خلاله اي تتغذي علي مشاعره وإحساسه وتقدر تقوم وتكمل،ولانك أيضا لديك احتياجات لا تستطيع ان تملائها أو تلبيها فتستغل شخص آخر يحاسب معاك على فاتورة مش بتاعته، وختاما ما استطيع ان اقوله ان العلاقات الصحيحة تبني علي المودة والرحمة، ومافيش حاجة اهم من “الرحمة و الحنيه”
الرحمة والحنيه أهم من الحب نفسه .. ناس كتير مننا قادرين يحبوا لكن قليل جدا اللى بيعرف يرحم ويبقي حنين على اللى حواليه، الرحمه والحنيه دي حاجه جميلة جدا من عند ربنا بتكون شئ فطري في الانسان الذي يملكهما ، ومافيش أبشع من الناس اللى قلوبهم بتعرف تقسى وتكسر وتخذل وتظلم، مافيش أبشع من اللى بيعرفوا يجوا على غيرهم ويوجعوا ويبهدلوا ويدمروا حياه الناس !!
عشان كده ربنا قال “فويلٌ للقاسية قلوبهم” . فربنا يرزقنا بقلوب نضيفه و بناس قلوبها رحيمة بينا وعلينا !!
