كتبت✍️أميرة محروس
غاري كاسباروف .. تقدر تقول عليه أفضل لاعب شطرنج في التاريخ
أسطورة فعلا ولو بتحب اللعبة فأكيد هتبقى عارف حجم المتعة والفن في أسلوب كاسباروف .. حاجة كده صعب تكرارها ويمكن مشوفناش زيها غير في الأسطورة التانية بوبي فيشر..
بعكس أناطولي كاربوف مثلا إللي صحيح بطل شطرنج كبير لكن أسلوبه ممل ممل ممل .. زي ما تكون بتتفرج على إيطاليا في الكورة كده..
كاسباروف هو حاجة زي زين الدين زيدان كده .. اللمسة الحلوة إللي تحسسك بجمال ومتعة اللعبة … فضل المصنف الأول على العالم من سنة 86 لحد سنة 2005 إللي اعتزل فيها..
فضل من غير هزيمة لمدة 22 سنة متواصلة..
سنة 89 كانت تاريخ أول مواجهة بين كاسباروف والكمبيوتر .. علماء الرياضة كانوا بدأو تطوير فكرة الذكاء الصناعي ومكنش في طريقة لاختباره أفضل من جيم شطرنج مع كاسباروف وانتصر كاسباروف..
حصلت محاولة تانية سنة 96 مع كمبيوتر من تطوير شركة أي بي إم … وبرده انتصر كاسباروف , خد بالك إننا بنتكلم هنا عن شخص بيكسب كمبيوتر بيحسب 200 مليون احتمال في الثانية..
وبعدين حصلت محاولة تالتة سنة 97 بعد تطوير الجهاز تاني .. وانهزم كاسباروف
كاسباروف اتهم المهندسين إللي صمموا الكمبيوتر بالتلاعب ..ولانه مش عيل صغير بيدبدب رجليه في الأرض عشان خسر فالموضوع كان فعلا محتاج إعادة نظر
بعد بحث طويل اكتشفوا ببساطة إن الكمبيوتر كسب الجيم بسبب خلل فني !!
آه يا فندم .. إللي حصل إن حصل خلل في برمجيات وخوارزمية الكمبيوتر خلاه يعمل حركة عشوائية ملهاش أي منطق .. وفجأة كاسباروف مبقاش قادر يفهم منطق الجيم قدامه وخسر !
تعرفوا ..أنا مش بخاف من ضربات الدنيا مهما كانت صعبة ,, مهما كان الجيم معقد
أنا بخاف من الضربة العشوائية .. إللي ملهاش منطق أقدر أفهمه وأتعامل معاه , الضربة إللي بتخليك فجأة متعرفش أول الجيم من آخره , متعرفش إحنا بنلعب على إيه أصلا
أنا بخاف من خلل الخوارزمية ..
