/ديدبان واقف بعُكًازى!/
***************
لسّايا بسمع صيحة الغُلمان
وببقى واقف منتشى وقلقان
مستنى فرحة تهزً ف كيانى
تقول انى بقيت ف امان
لسه الفرح م كملش والرمل
الجليل مدهوك بدمً الشُهدا
لسًانا بنمحى الغدر والخاينين
فازاى ح نهدا ودمِنا فاير
واحنا عشاير لينا اصل متين
احنا اللى حطمنا الغزاة على
أرض سينا وقبلها ف حطين
فازاى ح نهدا / ولو هدينا
مين ح يحوش
الاعادى بقم حُثالة م يختشوش
واقفين بغِِل بيحلموا ومتوتًَرين
وانا من سنين واقف براقبهم
وبرغم انى بقيت من الماضى
وعضمى هشوش
لسه الوشوش بتبصلى بدهشه
عشانى كنت جسور م بخافش
إلًَا من نفوس خاينين بيتمنًوا
يبيعوا الارض لدخيل اجنبى
*
ألفين نبى ورسول لم قِدروا
يوم على وغد بيخون الوطن
عايش م بينا بينتهز ويروووم
وانا اللى واقف ديدبان وف
ايدى عُكازى / بزوم / واسأل
سؤال لامتى ح نسامح ونغفر:
للى باعوا برُخص ضمايرهم
وهجروا الطين
لسايا واقف ديدبان وعيونى
فيها الف دهشه
الذكريات..بقى ليها وحشه؟
*
انا من سنين.بحلم وبحرسها
وواقف بالسلاح
لا شكيت ف يوم من حرًَها
ولا ضهرى من عـزم الألـم
طقطق وناح
م جريت بعُمرى ولا غفلت
وصـوتى راح
صابر برغم الألم /ع الحلم
حتى مع النزيف
سـبعـين خريف بـيـنـاهـدوا
جوّايا..وخريف
ح اهرب لفين وترابها دارى
اللى-الكلاب -طمعـانـه فـيـه؟
الآه كلتنى وبرضك بيها بتفاخر
والحلم لسًه بعيد / مالوش آخر
وعشانى بعشقها بقول ح استنى
حتى وحلمى متًاخر!!
************
الشاعر/أحمد عفيفي
مصر
ديدبان واقف بعُكًازى!
