امانى المغازى تكتب …تجوع البطن والنفس شبعانة

كتبت/ امانى المغازى

كان هذا شعار عفيفة النفس زينات صدقي لم تجد ايجار منزلها فى اواخر ايام حياتها ولم يحضر جنازتها أي فنان كبير او صغير

بعد موتها عثروا داخل مصحف صغير على ورقة مكتوب فيها بخط يدها “رسالة لربنا ،يارب افتحها في وشي..يارب هات لي شغل” يارب ارجع تاني اشتغل واسدد ديوني ،يارب تكرم ولاد اختي نادرة، وتهدي لها عيالها طارق وعزة، يارب تحنن على قلب صاحب البيت وتخليه يصبر على في دفع الايجار المتأخر..يارب ساعدني ووفقني واكرمني في صحتي وابعتلي شغل”

لكن ….

ظلت زينات صدقي 16 سنة في بيتها بلا عمل مظهرتش الا في السراب”، و”بنت اسمها محمود” 1975 وده اعلى فيلم اخدت فيه فلوس 500جنيه، ومثلت بدون اجر مجاملة للمنتجة لولا صدقي فى فيلم “خطيب ماما”.

كانت حين تعصرها الحاجة للمال تذهب للعمل في مسارح الشركات والجامعات.
وفي العيد، لاتتمكن من شراء اللحم فتأكل زينات صدقي في بيتها وحيدة الفول والجبنة ، بنفس راضية ومبسوطة، يسمعها جيرانها تغنى فى حجرتها : راح المال وراس المال ومبسوطين وممنونين .

تقول ابنة اختها : كنت دايما اشوفها بتهزر وتضحك، وعمرها ما بكت قدامنا، مع اني كنت عارفه انها بتبكي، تدخل اوضتها وتقفل على نفسها وتقعد تعيط على حالها من غير م حد ياخد باله.
بتقول في مره قولتلها: ياطنط م تروحي نقابة الممثلين ولا مبني التلفزيون وتوريهم وشك عشان يفتكروكي ويشغلوكي، فكانت تزعل قوي وتقولي: انتى ترضي لي اهين نفسي في العمر ده والمكانة دي، اسم زينات صدقي د انا عملته بدمي واعصابي وعمري ولا يمكن افرط فيه..انا مش ندمانة ولا زعلانة أني عيطت ..الفن اخد كل حاجه وم أخدتش منه اى حاجه..الناس عارفه تليفوني وعنواني واللي عاوزني يطلبني، إنما انا عمري ما أنزل اتسول دور ولا اقولهم انا اهه!

في فيلم شارع الحب، كانت تضع “عمود ” الاكل قدامها، (اللانش بوكس) وعدي عليها عبد الحليم حافظ، نادتله: اقعد ياحليم كل معايا، ده اكل مسلوق خفيف ع المعده، فقالها: ياماما زينات ياريت كنت اقدر، انا اكلي اهه وطلع من جيبه علبة دوا، فعيطت ونزل عبد الحليم يبوس راسها ويواسيها واصرت انها لاتاكل ولا “تحط لقمة في بقها” .

تحكى ابنة شقيقتها :
زينات صدقي كانت بتعطف على كومبارس اسمه ابراهيم فوزي، وفي مره كان واقف ع المسرح ووقع ع الارض نقلوه المستشفى لكنه ..مات، تكفلت هي بمصاريف جنازته، وكلمت ناس كتير عشان يحضروا جنازته، وكل م تعدي الجنازة على قهوة تروح للناس اللى قاعدين : الميت ده غلبان ينوبكم ثواب تعالوا امشوا وراه.. وراحت المسرح بعدها ودبت خناقة مع بديع خيري وسراج منير وعباس فارس، لانهم تكاسلوا عن تشييع الجنازة وقالتلهم: يعني ده لو كان يوسف وهبي ولا محمد عبد الوهاب مش كان زمانكم بتجروا ع الجنازة عشان تطلعوا في الصور..!!!

يمر الزمن وتموت الست زينات صدقى العظيمة ومحدش يمشي في جنازتها غير اهلها ولافنان واحد كبير او صغير !!!

Share on Facebook

Post on X

Follow us

Save