كتبت/ إنتصار حسين
……
ساعات الخوف م الدنيا
بيحمي…..
ساعات التردد بيكون نجاة…
لما تلاقي سنينك بتجري
وعايش متاهة فاكرها
حياه…
ساعات تحس القلق جرس
يدق ف عقلك ويقولك… لا
بلاش للمحبة.. تخطي
لتغرق تاني في بحر …الحياة
وعجبي لما تعيش ساعاتك
في حيرة مابين أه …ولا
تمر الليالي زي موج البحور
بموجها العالي في قلب الصخور
تخبط في قلبك وتحفر ألم
ولاحد يفهم جرحك منين
جاي من حبيب أو من عدم
وتفضل بجرحك طول الزمن
ولا طبيبك
هيقدر عنك يزيح الألم
ساعات …تشوف ورا الغيم بدر
مخبي حياة مافيها غدر
ينور ويحيي طريق الأمل
يطبطب عليك ويمحي الهجر
ساعات….ساعات…
ساعات نخاف من كلمة فرح
ونبني حواليها سور
أصلنا ومن كتر الجرح
بقينا نقلق يعدي الفرح
وييجي ع الجرح الدور
ساعات…ساعات…
ساعات تحس بالحب واللهفة
نفسك تجري عليه وبكل خفة
تقول كفاية نشوفه من بعيد
لايغدر تاني بينا في لحظة
ساعات تعيش باللي جواك في سُكات….
خايف يعرفوا انك لسة حي
ويرجعوك تاني للممات..
ساعات أحب السفر لمكان بعيد
وكل أملي ليهم ما اعود
وعيش الرحلة جوة الخيال
أفوق ألاقيني متكتف بالحديد
حتي الحلم كمان متكتف
حتي الخيال ممنوع م الصرف
لو كنا لبحر الحياة نعرف نجدِف
ما كنا توهنا في بحور العُرف
وهي ساعات تيجي وتروح
ونرجع تاني لدنيا الصمت
نعيش باللي فينا من جروح
ونمثل اننا حابين الصمت
وهو نار بتسري فينا
تعجل بموتنا .. تدوب فينا
ولو نتكلم نقول الآااااه
يقولوا اتجنن في آخر الحياة
وتمر الحياة بالسُكات
وهي هي شوية …ساعات
ساعات ….ساعات….
